Retrocessiuns
Retrocessiuns – era numnadas kickbacks – ein pigl investur privat nunveseivlas bunificaziuns da bancas ad administraturs dalla facultad ed intermediaturs da products en fuorma da provisiuns. Las bunificaziuns san ins divider en differentas categorias.
- Bunificaziuns tier la courtage. In administratur dalla facultad ha meglieras cundiziuns tier las bancas ch’in investur privat. Dat el buca vinavon dil tuttafatg ils rabats, obtegn el dalla banca la differenza sco participaziun alla sviulta.
- Bunificaziuns d’ina part dalla management fee da products da finanzas sco per exempel da fonds d’investiziun. Cheu setracta ei d’ina schinumnada cumissiun permanenta che vegn scuntrada normalmein mintga quartal.
- Provisiuns tier la cumpra da fonds d’investiziun en fuorma d’augmentaziuns dallas spesas. Igl intermediatur ni cussegliader obtegn ina part ni la cumpleina augmentaziun dallas spesas.
- Bunificaziuns tier las taxas da menar deposit. Exact sco tier la courtage ha igl administratur dalla facultad la pusseivladad d’obtener ina provisiun.
- Tier fatschentas da devisas san ins secunvegnir sin retrocessiuns entras schar esser igl aschinumnau spread pli gronds pil client che per igl administratur dalla facultad. La differenza obtegn igl administratur.
- Era tier l’intermediaziun resp. tier la conclusiun da hipotecas vegn pagau provisiuns.
Retrocessiuns vegnan pagadas directamein sil conto digl administratur dalla facultad. Denter il client ed igl administratur dalla facultad san ins secunvegnir che las retrocessiuns restan tier igl administratur dalla facultad e ch’el sto buca dar vinavon ellas al client.